భారీ వర్షాల ముప్పు: తెలుగు రాష్ట్రాల్లో వాతావరణం సంక్లిష్టం - అల్పపీడనం వాయుగుండంగా మారే అవకాశం

ఇకపై వర్ష బీభత్సం: వర్షాకాలం ముగిసి శీతాకాలం ఆరంభమవుతున్నప్పటికీ, అక్టోబరు చివరి దశలోనూ తెలుగు రాష్ట్రాలను వర్ష భయం వెంటాడుతోంది. ప్రస్తుతం అక్కడక్కడ తేలికపాటి జల్లులు కురుస్తున్నప్పటికీ, ఇవి క్రమంగా ఉద్ధృతమవుతాయని వాతావరణ శాఖ హెచ్చరించింది. ఈ వారం భారీ నుంచి అతి భారీ వర్షాలు కురుస్తాయని, వాతావరణంలో వేగంగా మార్పులు సంభవిస్తున్నాయని ఏపీ విపత్తు నిర్వహణ సంస్థ (APSDMA) తెలియజేసింది.

బంగాళాఖాతంలో అల్పపీడనం: వాయుగుండంగా మారే అవకాశం ఉపరితల ఆవర్తనం కాస్తా అల్పపీడనంగా మారిందని APSDMA ప్రకటించింది. ఇది నైరుతి బంగాళాఖాతంలో కేంద్రీకృతమై, క్రమంగా బలపడుతోందని తెలిపింది. ఈ అల్పపీడనం ప్రభావంతో పిడుగులతో కూడిన వర్షాలు కురుస్తాయని వాతావరణ విభాగం హెచ్చరించింది.

ముఖ్యంగా ఆంధ్రప్రదేశ్‌లోని రాయలసీమ, కోస్తాంధ్ర జిల్లాలపై దీని ప్రభావం అధికంగా ఉంటుందని APSDMA వెల్లడించింది. నెల్లూరు, తిరుపతి, చిత్తూరు, అన్నమయ్య, కడప, సత్యసాయి జిల్లాల్లో రాబోయే 24 గంటల్లో భారీ నుంచి అతి భారీ వర్షాలు కురిసే అవకాశం ఉందని హెచ్చరికలు జారీ చేసింది.

మరో 36 గంటల్లో వాయుగుండం: ఈ అల్పపీడనం రాబోయే 36 గంటల్లో, అంటే బుధవారం సాయంత్రం లేదా రాత్రికి, వాయుగుండంగా బలపడే అవకాశం ఉందని వాతావరణ శాఖ అంచనా వేసింది. ఇది పశ్చిమ-వాయువ్య దిశగా కదులుతూ నైరుతి, దానికి ఆనుకుని ఉన్న పశ్చిమమధ్య బంగాళాఖాతంలో వాయుగుండంగా మారే అవకాశం ఉందని తెలిపింది. ఈ వాయుగుండ ప్రభావంతో భారీ వర్షాలు కురిసే అవకాశం ఉందని APSDMA ప్రకటించింది.

ఏపీలో సహాయం కోసం టోల్ ఫ్రీ నంబర్లు: భారీ వర్షాల హెచ్చరికల నేపథ్యంలో ఆంధ్రప్రదేశ్‌ ప్రభుత్వం అప్రమత్తమైంది. భారీ వర్షాలు, వరదలు, ఈదురుగాలులు, పిడుగుల నుంచి ప్రజలను రక్షించేందుకు ప్రభుత్వం చర్యలు తీసుకుంటోంది. సహాయక చర్యల కోసం ఎన్డీఆర్ఎఫ్, ఎస్డీఆర్ఎఫ్ బృందాలతో పాటు అధికార యంత్రాంగాన్ని సిద్ధం చేసింది. అత్యవసర సహాయం కోసం APSDMA కంట్రోల్ రూం నంబర్లు 112, 1070, 18004250101 కు కాల్ చేయాలని ప్రజలకు సూచించింది.

తీర ప్రాంతాలలో అల్లకల్లోలం: మత్స్యకారులకు హెచ్చరిక ఉత్తర తమిళనాడు, దక్షిణ ఆంధ్రప్రదేశ్ తీర ప్రాంతాలకు సమీపంలో వాయుగుండం ఏర్పడే అవకాశం ఉన్నందున, ఈ ప్రాంతాల్లో ఈదురుగాలుల తీవ్రత ఎక్కువగా ఉంటుందని వాతావరణ శాఖ హెచ్చరించింది. సముద్రం అల్లకల్లోలంగా మారే అవకాశం ఉన్నందున, తీరప్రాంత ప్రజలు అప్రమత్తంగా ఉండాలని, మత్స్యకారులు చేపల వేటకు వెళ్లకూడదని సూచించింది. ఇప్పటికే సముద్రంలో ఉన్నవారు తక్షణమే వెనక్కి రావాలని ఆదేశించింది.

పిడుగుల ప్రమాదంపై జాగ్రత్తలు: ఈదురుగాలులతో పాటు పిడుగుల ప్రమాదం పొంచి ఉన్నందున, ప్రజలు చెట్ల కింద ఆశ్రయం తీసుకోరాదని ఏపీ విపత్తు నిర్వహణ సంస్థ సూచించింది. వరదలు సంభవిస్తే సురక్షిత ప్రాంతాలకు తరలివెళ్లాలని కోరింది. వర్ష ప్రభావిత ప్రాంతాల్లో ఎలాంటి ప్రమాదాలు జరగకుండా ముందస్తు చర్యలు తీసుకుంటున్నట్లు APSDMA ఎండీ ప్రఖర్ జైన్ తెలిపారు.

తెలంగాణలోనూ వర్షాలు: తెలంగాణలోని భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హన్మకొండ, జనగాం, సిద్దిపేట, యాదాద్రి భువనగిరి, రంగారెడ్డి, హైదరాబాద్, మేడ్చల్, వికారాబాద్, సంగారెడ్డి, మెదక్, కామారెడ్డి, మహబూబ్ నగర్, నాగర్ కర్నూల్, వనపర్తి, నారాయణపేట, జోగులాంబ గద్వాల జిల్లాల్లో వర్షాలు కురిసే అవకాశాలున్నాయి. ఈ జిల్లాల్లో అక్కడక్కడ ఈదురుగాలులతో కూడిన మోస్తరు నుంచి భారీ వర్షాలు కురిసే అవకాశం ఉన్నందున హైదరాబాద్ వాతావరణ కేంద్రం ఎల్లో అలర్ట్ జారీ చేసింది. వర్ష సమయంలో ప్రజలు అప్రమత్తంగా ఉండాలని అధికారులు సూచిస్తున్నారు.